NLdoet 2022

NLdoet, en De Douf Neut doon mit! Mit 15 man sterk, grwaot en klein hubbe veer oos bie de Egelopvang Stein aangemeld om egelhuuskes te boewe. Ze waore verpopzakt dat veer mitzwaoveul man kaome en veer zeen oetgeweke nao de locatie in Born omdat dao mjae plaats is. Workmates, plenk, sjroeve, alles laog vaerdig. Toen veer de puzzel einmaol begrepe ging ut hjael rap en waor ut ein geolied mesjien. Auch de jongste holpe good mit: sjroeve telle en aangaeve, de winkelhaok zeuke en brenge, plenkes sjoere zie waore net zwao drök es de grwaote bezig. Om hauf 3 waor al ut materiaal op en stonge dao 11 egelhuuskes. Wie veer ut gepresteerd hubbe weite veer neet, mer d'r zeen auch egelhuuskes veur lènks-henjige egels. Dees huuskes hubbe de ingank dus aan de angere kentj.

Wilt geer zwao ein uniek exemplaar? Wach neet te lang en num contact op mit de Egelopvang Stein. Ut geld kump good terech, ut is hel nwaedig veur de opvang, de verzurging van de deerkes en ongertösje hubt geer ein sjwanne villa veur de egel thoes.

Egelopvang Stein bedankt veur de gooj zörg, de werm ontvangst mit koffie en vlaai en de heerlijke lunch. Ut waor ein geweldige daag.